पुणे प्रवाह न्युज पोर्टल
पुणे- केंद्र सरकारच्या आंतर-मंत्रालयीन पथकाने आज मंगळवार, दि. २१ एप्रिल २०२० रोजी पुणे स्मार्ट सिटीच्या कमांड अँड कंट्रोल सेंटर येथील करोना वॉर रूमला भेट 
केंद्रीय ऊर्जा मंत्रालयाचे अतिरिक्त सचिव संजय मल्होत्रा यांच्या नेृतृत्वाखालील पाच सदस्यीय पथक पुण्यात आढावा घेण्यासाठी दाखल झाले आहे. यावेळी महापौर मुरलीधर मोहोळ, महापालिका आयुक्त शेखर गायकवाड, अतिरिक्त महापालिकाआयुक्त व पुणे स्मार्ट सिटीच्या मुख्य कार्यकारी अधिकारी रुबल अग्रवाल, जिल्हाधिकारी नवल किशोर राम, शंतनू गोयल, सहायक आरोग्य अधिकारी डॉ. वैशाली जाधव, माहिती तंत्रज्ञान विभागप्रमुख राहुल जगताप व इतर अधिकारी उपस्थित होते. आयुक्त शेखर गायकवाड व रुबल अग्रवाल यांनी वॉर रूमचे स्वरूप व कार्यपद्धतीबाबत माहिती दिली.
महापौर मुरलीधर मोहोळ म्हणाले, "विविध प्रशासकीय विभागांचा समन्वय साधून करोनाबाबत उपाययोजना करण्यासाठी स्मार्ट सिटी कमांड सेंटर येथील वॉर रूमची भूमिका महत्त्वाची ठरत आहे. या माध्यमातून करोनाचा प्रभाव नेमका कोणत्या भागावर, घटकांवर झाला आहे याबाबतचे विश्लेषण करणे शक्य होत असून त्यामुळे प्रशासनाची निर्णयक्षमता वाढते."
करोना विषाणूचा प्रादुर्भाव रोखण्यासाठी आपत्ती व्यवस्थापन कायद्यानुसार अनुपालन करण्याच्या अनुषंगाने पुणे आणि मुंबई येथील परिस्थितीचा आढावा घेण्यासाठी केंद्र सरकारची दोन आंतर-मंत्रालयीन केंद्रीय पथके दाखल झाली आहेत. पुणे शहरातील लॉकडाऊनची अंमलबजावणी कशा पद्धतीने होत आहे. नागरिकांचे घराबाहेर पडणारे लोक, त्यांचे सोशल डिस्टन्सिंग, तसेच तपासणी, विलगीकरण, उपचारांसंदर्भात आरोग्य यंत्रणेची सुसज्जता, या सेवेत आघाडीवर काम करणारे सेवक, डॉक्टरांबाबत घेण्यात येणारी खबरदारी, संबंधित पीपीई किट, सोशल डिस्टन्सिंगचे पालन याबाबत माहिती घेतली.
महापालिकेने सुरू केलेल्या ७४ फ्लू क्लिनिकपैकी वडगाव फ्लू क्लिनिकला, तसेच सिंहगड कोविड केअर सेंटर, लायगुडे रुग्णालय, सोनावणे रुग्णालय, मोबाईल व्हॅन यांची पथकाने भेट दिली. तसेच घरोघरी जाऊन सर्वेक्षण करणाऱ्या कर्मचाऱ्यांशी त्यांनी संवाद साधला.
पुणे शहरात करोना संबंधी सर्वेक्षण करणारे कर्मचारी, डॉक्टर यापैकी कोणासही अद्याप संसर्ग आढळून आलेला नाही यावरून ते कर्तव्य बजावताना योग्य खबरदारी घेत आहेत हे दिसून येते. याबाबत केंद्रीय पथकाने समाधान व्यक्त केले.
