पुणे प्रवाह न्युज पोर्टल
*जीना इसीका*,
. . . *नाम है*. . !
जिने असतात अबोल, पण खूप काही सांगणारे . . .
प्रगतीचा आलेख, पायरीपायरीने उंचावतो,कोसळताना मात्र, छोटे निमित्त पुरते . . .
जिने अबोल असतात, पण . .
जिन्याची सुरवात, जमिनीशी नाते सांगणारी, ऊंचीवर नेऊन, दूरदृष्टी देणारी !
आकाश आणि जमिनीचा दु(रा)वा ठरणारे . . .
जिने असतात अबोल . . .
जिन्याला असतात भक्कम पाय-या, आधारासाठी नक्षीदार कठडे, आंणि उतरण सुद्धा सुकर, मात्र अनेकांना याचाच विसर !
जिने असतात अबोल . . .
जीर्ण इमारतीचा जिना,मोडकळीस असतो, नक्षी तुटून जाते, आधाराचे हात दुरावतात,अगदी निराधार वृद्धासारखे !
जिने अबोल असतात पण . . .
जिना असतो हवेलीत, राजमहालात ,जंगलात, द-याखो-यात सुद्धा ! गरीबाच्या खोपटात मात्र . . .
जिना असतो अबोल पण . .
जिना मातीचा, घडीव कातळाचा, नक्षीदार काष्ठाचा, वास्तू सौंदर्याचा आधार . . .रूप जरी वेगळे तरी,चढउताराचा साक्षीदार !
जिना असतो अबोल पण . . .
अनेकांना प्रगतीसाठी, फक्त शिडी हवी असते, इथे जिना ठरतो अडगळ. . .दूर करता येत नाही !
जिना असतो अबोल पण . .
अत्युच्च स्थानी पोचायला, अनेकांना
'लिफ्ट' हवी असते, मात्र जिन्याची चढण मंद असली तरी दमदार असते !
जिना असतो अबोल पण . .
युगे उलटली तरी निवा-याची गरज, कालातीत आहे. प्रगतीचे आयाम वेगळे तरी जगण्याची लय आंणि टप्पा ,अपरिहार्य आहे. . .
जिना असतो अबोल पण . . .
काही जिने ईश्वरी, आशेचा अंकूर रुजवणारे, जगण्याचा सुगंध आणि निराकारातील ओंकार !
जिना असतो अबोल पण. . .
जिना आणि जीना, फरक फक्त भाषेचा, -हस्व दीर्घ वेलांटीचा, चढ उतारांच्या आलेखाचा !
जिना असतो अबोल पण . . .
*आनंद सराफ*
